अमेरिकाका लागि नेपाली राजदुत डाक्टर युवराज खतिवडाको ओहोदाको प्रमाणपत्र अमेरिकी राष्ट्रपति जो बाइडेनले स्वीकार गरेका छन् । बाइडेनले गत बुधबार खतिवडाको ओहोदाको प्रमाणपत्र स्वीकार गरेको वासिंटन डिसीमा रहेको नेपाली दूतावासबाट जारी वक्तब्यमा जनाइएको छ ।

खतिवडाले नेपालका राष्ट्रपति, प्रधानमन्त्री र नेपाली जनताका तर्फबाट अमेरिकी राष्ट्रपति जो बाइडेनलाई शुभकामनासहित ओहोदाको प्रमाणपत्र पठाएका थिए । बाइडेनका तर्फबाट ओहोदाको प्रमाणपत्र प्राप्त भएको जानकारी दिदै खतिवडालाई स्वागत गरिएको छ ।

सामान्यतया भौतिक रुपमा नै उपस्थीत भएर ओहोदाको प्रमाणपत्र बुझाउने प्रचलन भएपनि कोरोनाको महामारीका कारण ओहोदाको प्रमाणपत्रमात्र पत्रमार्फत  ह्वाइटहाउसमा पठाइएको दूतावासले जनाएको छ । खतिवडा नेपाल राष्ट्र बैङ्कको पन्ध्रौँ गभर्नर थिए भने उनले कोलम्बोमा यूएनडीपी रिजनल सेन्टरमा तीन वर्ष अर्थशास्त्रीको रूपमा काम गरेका थिए ।