आत्मीयता, सेवा र सांस्कृतिक सन्देश

राजविराज /  नेपाली मधेशको माटो, मानिस र संस्कृति यति आत्मीय लाग्दो रहेछ भन्ने अनुभव गर्दै, १६ जना अन्तर्राष्ट्रिय विद्यार्थीहरू राजविराजबाट फर्किए — मनमा जीवनभर नबिर्सिने अनुभव बोकेर। ‘नेपाल युनाइटस’द्वारा आयोजना गरिएको अन्तर्राष्ट्रिय स्वयंसेवा कार्यक्रम अन्तर्गत आएका यी विद्यार्थीहरूले न केवल सामाजिक सेवा गरे, तर मधेशको विविधता, मौलिकता र मानवता पनि नजिकबाट बुझे।

ताइवानका १४, मलेसिया र भियतनामका १÷१ जना गरी १६ जना विद्यार्थीहरू नेशनल चुँग सिंग युनिभर्सिटी, ताइवानका हुन्। उनीहरू असार १८ गते सप्तरीको राजविराज आइपुगेका थिए र १० दिनसम्म स्थानीय घरपरिवारमा बसेर मधेशको संस्कृतिमा पूर्ण रुपमा समाहित भए।

सेवा र शिक्षा — अन्तर्राष्ट्रिय स्वरूपमा

उनीहरूको दिनचर्या केवल अवलोकनमा सीमित रहेन। राजदेवी मन्दिर र श्री राजदेवी ठाकुरदेवी योगेन्द्र भगत माध्यमिक विद्यालय परिसरमा सरसफाइ अभियान, बालबालिकासँग अन्तरक्रिया, खेल, चित्रकलामार्फत शिक्षण, र सिर्जनात्मक गतिविधिमा उनीहरू समर्पित भए।

विद्यालयका प्रधानाध्यापक दिनेश प्रसाद ठाकुर भन्छन्, “स्वयंसेवकहरूले देखाएको शिक्षा दिने शैली र आत्मीय व्यवहारले हाम्रो बालबालिकाको आत्मविश्वास, सृजनशीलता र सहभागितामा उल्लेखनीय वृद्धि भएको छ।”

सांस्कृतिक  र आत्मीय सम्बन्ध

विद्यार्थीहरू होटलमा नभई स्थानीय परिवारसँग बसे। यसले उनीहरूलाई मधेशको जीवनशैली, खानपान, बोलीचाली, भेषभूषा र पारिवारिक सम्बन्धको प्रत्यक्ष अनुभव दिलायो। कार्यक्रमका लिडर जोनीले बताए, “हामी केवल सेवामा आएनौँ, हामी आफैँ पनि यहाँका संस्कृति र जीवनको विद्यार्थी भयौं।”

विश्वमैत्रीको पुल बन्दै नेपाल–अन्तर्राष्ट्रिय सम्बन्ध

कार्यक्रमको अन्तिम दिन, नेपाली साथीहरूसँग अनुभव आदानप्रदान गर्दै, स्वयंसेवक भायोला भन्छिन्, “नेपालले जुन आतिथ्यता र अपनत्व दिएको छ, त्यो मेरो जीवनको अविस्मरणीय अनुभव हो। मैले यहाँ केवल सेवा होइन, साँचो सम्बन्ध पनि पाएँ।”

नेपाल युनाइटसका राष्ट्रिय निर्देशक मोहम्मद आयतुल्ला रहमान भन्छन्, “विद्यार्थीहरूले जुन उत्साह र समर्पणका साथ काम गरे, त्यो नेपाल र विदेशी युवाबीचको मित्रता बलियो बनाउन सफल भयो। मधेशको सकारात्मक पहिचान विश्वसामु प्रस्तुत गर्न यस कार्यक्रमले ठूलो भूमिका खेलेको छ।”

युवाको सहभागिता र भविष्यको योजना

कार्यक्रमको सफल समापनसँगै, आयोजकले भविष्यमा यस्ता अन्तर्राष्ट्रिय युवा आदानप्रदान कार्यक्रमलाई निरन्तरता दिने प्रतिबद्धता जनाएको छ। यसले नेपालमा अन्तर्राष्ट्रिय स्वयंसेवा संस्कृतिको प्रवर्द्धन मात्र होइन, विविध संस्कृतिबीच समझदारी र सहकार्यको वातावरण पनि तयार गर्छ।