|
अमेरिका क्यालिफोर्निया/ झन्डै पन्ध्र महिना अघि नेपाल सरकारले निक्कै तामझाम गरेर ल्याएको गैर आवासीय नेपाली नागरिकता ऐन आजसम्म पनि प्रयोजनहीन छ ! न त यसको कार्यान्वयनका लागि आवश्यक नियमावली तयार भएको छ, न यो ऐनलाई सहयोग पुर्याउने अन्य ऐनहरु नै संशोधन गरिएको छ ।
सरकारको यस्तो वेवास्ता र हेलचेक्र्याँइबाट गैरआवासीय नेपालीहरु आजित भएका छन् ।त्यसैले अब बंशजको नागरिकताको निरन्तरता नै गैरआवासीय नेपालीको आवाज बन्दै गएको छ ।
यसै सन्दर्भमा विगत ७/८ महिनादेखि संचालित “नागरिकता खोई ” अभियानका संयोजक बासु घिमिरे विगत सात महिनादेखि नेपालमै बसेर व्यापक सम्पर्क तथा छलफल र बहसमा लागेका छन् ।
उनले नेपालका मूख्य राजनीतिक पार्टीका नेताहरु , बौद्धिक व्यक्तित्व , कलाकार , पत्रकार लगायत समाजका सबै तप्काका सरोकारवालाहरुलाई आफ्नो अभियानका बारेमा प्रष्ट्याउने काम गरिरहेका छन् ।
“नागरिकता खोई” अभियानको उदेश्य, नेपालको सामाजिक र आर्थिक क्षेत्रमा यसले पुर्याउने सकारात्मक उपलब्धिका बारेमा सरोकारवालाहरुलाई शिक्षित र जागरुक पार्न सक्रिय देखिएका छन्। केहीदिन अघि नेपाली काँग्रेसका वरिष्ठ नेता डा. शेखर कोइरालासंग यो अभियानले गरेको छलफल निक्कै चर्चामा आयो । विश्वभर यो अभियानले गैरआवासीय नेपालीहरुलाई जोड्ने काम प्रारम्भ गरेको छ ।
यस अभियानका अभियान्त घिमिरेले वंशजको नागरिकता निरन्तरता दिइएमा विदेशमा रहेका धेरै नेपालीहरुले नेपालमा निर्धक्क व्यवसायमा लगानी गर्ने, अवकाश जीवन बिताउन जाने हुँदा त्यसबाट नेपाललाई अरबौँ डलर रेमिट्यान्स, लगानीका रुपमा प्राप्त हुने बताएका उनले यसबाट सरकारलाई कुनै हानी नहुने पनि स्पष्ट पार्दै आईरहेको छ।
अभियानले यहि मार्च २३ मा लसएन्जलसमा रहेका सम्पुर्ण संघसंस्थाहरु र गैरआवासीय नेपाली संघ (एनआरएन) क्यालिफोर्नियाको संयुक्त आयोजनामा श्री पशुपतिनाथ फाउन्डेसन तथा बुध्द मन्दिर नोर्वाकमा (10843 Kenney St, Norwalk, CA 90650) दिउंसो २:३० बजे अन्तरक्रिया कार्यक्रमको आयोजना गरिदैछ।
यसअघि गैरआवासीय नेपाली संघ (एनआरएन) टेक्सस च्याप्टरके आयोजनामा टेक्सासको ड्यालसमा, र क्यालिफोर्निया सन्फ्रान्सीस्को शहरहरुमा अन्तरक्रिया कार्यक्रम सम्पन्न भैसकेको छ ।
