क्यालिफोर्निया/ गैर आवसिय नेपाली संघ (एनआरएनए) राष्ट्रिय समन्वय परिषद् अमेरिकाको आयोजनामा यस वर्ष कोलोराडोमा अन्तराष्ट्रिय नारी दिवस मनाइने भएको छ । हरेक बर्ष मार्च ८ का दिन मनाईने ११४ औं अन्तर्राष्ट्रिय नारी दिवस आगामी मार्च महिनाको ९ तारिखका दिन कोलोराडोस्थित नेपाली घरमा उक्त कार्यक्रम आयोजना गर्न लागिएको हो।

अन्तरराष्ट्रिय महिला दिवस यो ८ मार्चमा विश्वभर मनाइन्छ । अन्तराष्ट्रिय नारी दिवसको अवसरमा संसारभर विभिन्न कार्यक्रमहरु द्वारा महिला अधिकार, महिला सशक्तिकरण र समानता आदि सवालहरू अन्तराष्ट्रिय महिला दिवसका बिषयहरू हुने गरेका छन् ।

यसै सन्दर्भमा बिभिन्न क्षेत्रमा महिलाले गरेका ऐतिहासिक योगदानको क़दर गर्दै अन्तर्राष्ट्रिय नारी दिवसका अवसरमा एकअर्काका विविधता सहितका गुणहरूको सम्मानसाथ एनसीसी अमेरिकाकाले यो कार्यक्रम आयोजना गरेको
महिला सचिव शान्ति वाग्ले पौडेल बताउंछिन् ।

एनसीसी अमेरिकाका महिला उपाध्यक्ष सुनिता कँडेल, महिला सचिव शान्ति वाग्ले पौडेल, महिला संयोजक सुनिता खत्री, एनसीसी अमेरिकाका बोर्ड सदस्यहरु सिर्जना शर्मा, दुर्गा तिवारी, सरु शर्मा र रितादेवी प्रधान, कोलोराडो च्याप्टरकी महिला उपाध्यक्ष दिलकुमारी श्रेष्ठ, महिला सचिव संगिता लामा, महिला संयोजक श्रृति पाण्डे, कोलोराडो च्याप्टरकी बीओडी सुनन्दा डंगोल र शर्मिला शर्मा तथा कोलोराडो नेपाली महिला फोरमकी संयोजक श्रृजना भट्टको नेतृत्वमा कार्यक्रम सम्पन्न गर्न लागिएको हो ।
विभिन्न संघसंस्थाका अगुवा महिलाहरुको नेतृत्वमा बन्ने समिति र उपसमितिहरुसहित विभिन्न क्षेत्र र विधाका विज्ञहरुद्वारा कार्यक्रम सफल पारिने छ । एनआरएनए एनसीसी अमेरिकाको आयोजनामा कोलोराडोमा पहिलोपटक राष्ट्रियस्तरको कार्यक्रम हुन लागेको हो ।

कोलोराडो बाहिरबाट आउने पाहुनाहरुलाई बस्ने–खाने व्यवस्थाका लागि होटलहरुसँग केही दिनमा सम्झौता गरिने बुझिएको छ ।
यसैबीच एनआरएनए कोलोराडो च्याप्टरको सहआयोजना तथा कोलोराडो नेपाली महिला फोरम र कोलोराडो क्षेत्रमा क्रियाशील अन्य सम्पूर्ण स्थानीय संघसंस्थाको समन्वयमा कार्यक्रम भव्यताका साथ सम्पन्न गर्ने तयारी भैरहेको छ,साथै सम्पूर्ण संघसंस्थाको साथ र सहयोगमा कार्यक्रमलाई सभ्य र भव्यताका साथ सम्पन्न गर्ने तयारीमा जुटेको एनआरएनए कोलोराडो च्याप्टरका अध्यक्ष प्रकाश पौडेलले बताउनु भयो ।

‘यो कार्यक्रम सम्पन्न गर्न पाउनु कोलोराडोवासी सम्पूर्ण नेपालीहरुको लागि गौरबको विषय हो, तसर्थः कार्यक्रममा सबैको साथ र सहयोग रहनेमा आशावादी छौं’–अध्यक्ष पौडेलले भन्नुभयो ।
अमेरिकामा एनआरएनएका सबै च्याप्टरहरुबाट कार्यक्रममा सहभागिता रहने छ । कार्यक्रममा करीब ५०० जनाको सहभागिता रहने प्रारम्भिक आंकलन छ । ‘हामी कार्यक्रमलाई हरेक हिसावले व्यवस्थित र ऐतिहासिक बनाउन लागि परेका छौं’–एनआरएनए कोलोराडोका निवर्तमान अध्यक्ष आरसी पन्तले बताउनु भयो ।
एनआरएनए एनसीसी अमेरिकाबाट एउटा ठूलो अवसर पाएको बताउँदै त्यो अवसरलाई गम्भीरताका साथ पूरा गर्न आफूहरु एक महिना अघिबाटै विशेष तयारीमा जुटिसकेको कोलोराडो च्याप्टरका संस्थापक अध्यक्ष बाशुदेव खनालले बताउनु भयो ।
यता ९ मार्च २०२४ का दिन कोलोराडो नेपाली घरमा आयोजना गरिएको उक्त कार्यक्रममा सहभागिताका लागि एनआरएनए एनसीसी अमेरिकाका महासचिव रामहरी अधिकारीले सबैलाई अनुरोध गर्नु भएको छ ।
कार्यक्रमकालाई कसरी प्रभावकारी बनाउने भन्ने बारेमा योजना बनाउने चरणमा रहेकाले यदी यस सम्बन्धी कुनै प्रश्न, सल्लाह सुझाव वा थप जानकारी चाहिएमा info@nrnusa.org, cochapter@nrnusa.org मा इमेल गर्न समेत महासचिव अधिकारीले अनुरोध गर्नु भएको छ ।