एजेन्सी/नयाँदिल्ली । बलिउड एक्सन किङ अक्षय कुमार फिल्म छायांकनका लागि बेलायत प्रस्थान गरेका छन् । उनी, चलचित्र ‘बेल बटम’को छायांकनका लागि आज लण्डन उडेका हुन् । उनीसँग अभिनेत्री ट्विंकल खन्ना र उनका दुई सन्तान पनि लण्डन उडेका छन् ।
भारतमा कोरोना भाइरसको संक्रमण बढिरहेको समयमा अक्षय र उनको टिम चलचित्र छायांकनका लागि लण्डन पुगेको हो । उनीहरु, चार्टर फ्लाइटबाट लण्डन उडेका हुन् । चलचित्रको छायांकनका लागि अक्षयसँगै नायिका लारा दत्त, निर्माता ज्याकी भगवानी, हुमा कुरेसी, निर्देशक रञ्जित एम तिवारी पनि लण्डन उडेका छन् । कोरोना भाइरसको संक्रमण चलिरहेको समयमा अन्य निर्माताले चलचित्रको छायांकन सुरु गर्न सकेका छैनन् ।
अक्षयले भने सधै डरमा बाँच्न नहुने बताउँदै चलचित्रको छायांकन सुरु गरेका हुन् । थ्रिलर कथामा बन्न लागेको यो चलचित्र सन् १९८० को सेटमा छायांकन गरिनेछ । चलचित्रमा अक्षयको साथमा बानी कपुर, हुमा कुरेसी, लारा दत्त लगायतका कलाकारको मुख्य भूमिका रहनेछ ।