|
पहिलो दिनमा वडा नं. १ बिजयी
बर्दिया । बढैयाताल गाउँपालिकाको शान्तिपुरमा आजबाट शुरु भएको दोश्रो वडा स्तरीय फुटबल प्रतियोगितामा पहिलो खेलमा वडा नं. १ ले १ गोलको विरुद्ध २ गोल प्रहार गरि बिजयी सुरुवात गरेको छ । वडा नं. १ का खेलाडी सौगात रावतले खेल सुरु भएको ३ मिनेट मै १ गोल गर्न सफल भए । त्यसगरि अर्को खेलाडी भुपेन्द्र ढकालले ३९ औं मिनेटमा १ गोल प्रहार गरि खेललाई अग्रता लिएका थिए भने वडा नं.२ का खेलाडी लोकेन्द्र खत्रीले २० मिनेटमा १ गोल मात्र फर्काउन सफल भएका थिए ।
न्यु शान्ति स्पोर्ट्स क्लबको आयोजना तथा बढैयाताल गाउँ पालिका वडा नं. १ को समन्वयमा सो फुटबल प्रतियोगिता आजबाट शुरु भएको छ । बढैयाताल गाउँ पालिका वडा नं. १ का वडा अध्यक्ष प्रेम बहादुर थापा र वडा नं. २ का वडा अध्यक्ष डिलादेब गिरिले मैनबत्ती बालेर खेलको उदघाटन गर्नु भएको थियोे । वडा अध्यक्ष तथा प्रमुख प्रशासकिय अधिकृत अर्जुन सुवेदी लगायत अतिथिहरुले फुटबल रेफ्रीलाई हस्तान्तरण गरि खेलको सुरुवात भएको थियो ।
बल हस्तान्तरण गर्नु हुँदै वडा अध्यक्ष प्रेम बहादुर थापाले फुटबल खेलाडीलाई थप हौसला प्रदान गर्न देश बिदेशमा रहनु भएको खेलप्रेमीलाई सहयोग तथा सहकार्यको समेत आह्वान गर्नु भएको छ । जसले गर्दा युवाहरु कुलत बाटोमा नहिडी खेलकुदमा समर्पित हुने वातावरणको सृजना हुने विश्वास लिएको छ । उदघाटनको अवसरमा बिद्यार्थीहरुबाट विविध साँस्कृतिक कार्यक्रम र मार्च पास साथै जाजरकोटी समुहको नाचले रौणक थपिएको थियोे ।
पुस १६ गतेसम्म चल्ने प्रतियोगितामा १० टोलीको सहभागिता रहेको क्लबका अध्यक्ष प्रेम पुनले जानकारी दिनुभयो । खेलमा प्रथम हुनेलाई ५० हजार र दोस्रो हुनेलाई २५ हजार नगदसहित सम्मान गरिने आयोजकले जनाएको छ ।
