काठमाडौ । सुर्खेत घर भएकी २८ वर्षीया अभिनेत्री एवम् मोडल दिपाशा बीसी(जलपरी)को निधन भएको छ। स्वास्थ्यमा असहज भएपछि उनलाई बुधबार राति थापाथली स्थित नर्भिक अस्पतालमा भर्ना गरिएको थियो तर बिहीबार बिहान अस्पतालले मृत घोषणा गरेको हो।

उनको जन्म वि.सं २०५२ सालमा सुर्खेतमा भएको थियो । तर, उनले लामो समयदेखि काठमाडौंमा रहेर मोडलिङ पेशामा काम गरिरहेकी थिइन् ।

मोडल विसीले केही नेपाली फिल्म र दर्जनौं म्युजिक भिडियोमा अभिनय गरेकी छिन् । विशेषगरि, उनले लोकगीतका म्युजिक भिडियोमा धेरै अभिनय गरेकी छिन् । उनले अभिनय गरेको फिल्ममा ‘बिरानो माया, छाल, झेली, दुलाहा रानी’ लगायतका फिल्ममा अभिनय गरेकी थिइन् ।

यस्तै, उनले ‘तीज चाड नारीको, अच्छा लेकिन, नानी माई, सानी माया, तिमी नभए’ लगायतका दर्जनौं म्युजिक भिडियोमा काम गरेकी थिइन् ।

केहि दिन अघि मात्र सुटिङ सकिएको ‘सुन माया’ बोलको गित सार्वजनिक हुन नपाउदै उनको निधन भयो।