|
काठमाडौं / नेपालले त्रिकोणात्मक क्रिकेट सिरिजमा लगातार दोस्रो जित दर्ता गरेको छ । काठमाडौंस्थित मुलपानी क्रिकेट स्टिडियममा आज भएको खेलमा नेपालले हङकङलाई ६ विकेटले पराजित गरि लगातार दोस्रो जित दर्ता गरेको हो । यसअघि नेपालले सिरिजको पहिलो खेलमा यूएईलाई ७ विकेटले हराएको थियो ।
हङकङले प्रस्तुत गरेको ९५ रनको लक्ष्य नेपालले ओपनर आसिफ शेखको ४२ रन र कप्तान रोहित पौडेलको अविजित २५ रन तथा गुल्सन झाको १४ रनमा नकआउट रहदा १३.४ ओभरमा ४ विकेटको नोक्सानीमा लक्ष्य पुरा गर्यो । हङकङका इसान खानले ३ तथा यासिम मुर्ताजाले २ विकेट हात पारे ।
टस हारेर सुरुआती ब्याटिङ गरेको हङकङ ३ बल अगावै ९४ रनमा अलआउट भएको थियो । टस जितेर फिल्डिङ गर्ने कप्तान रोहित पौडेलको निर्णयलाई सहि साबित गर्दै तिव्र गतिका बलर करन केसीले ४ विकेट लिएपछि हङकङको ब्याटिङ लाइन धरासायी बनेको थियो । हङकङले नेपालको तिव्र गतिको बललाई खेल्न र स्पिनरलाई झेल्न समेत सकेनन् ।
नेपालका लागि सोमपाल कामी र अविनास बोहोराले समान दुई तथा कुशल मल्ल र मौषम ढकालले समान एक विकेट लिएपछि हङकङ ९४ रनमा समेटिएको हो । हङकङका लागि यासिम मुर्ताजाले ३६ रन बनाउनु बाहेक अन्यको प्रर्दशन उल्लेख्य रहन सकेन । जिसान अलीले १७ रन बनाए । अन्यले दोहोरो अंक समेत छुन सकेनन् ।
टी ट्वान्टी विश्वकप छनोटको तयारी स्वरुप नेपाल क्रिकेट संघ क्यानले सिरिजको आयोजना गरेको हो । सिरिजमा नेपाल सहित यूएई र हङकङ समावेश छन् । सिरिजको फाइनल खेल कात्तिक १० गते शुक्रबार त्रिवि मैदान कीर्तिपुरमा हुनेछ ।
