|
काठमाडौं / सरकारले नेपाल रेडक्रस सोसाइटीको नयाँ तदर्थ समिति गठन गरेको छ। मंगलबार बसेको मन्त्रिपरिषद् बैठकले विशालकुमार भण्डारीको अध्यक्षतामा ९ सदस्यीय तदर्थ समिति गठन गर्ने निर्णय गरेको हो।
सरकारले रेडक्रसको संस्थागत व्यवस्थापनलाई प्रभावकारी बनाउने तथा संगठनका गतिविधिलाई नियमित रूपमा सञ्चालन गर्ने उद्देश्यले नयाँ समिति गठन गरेको जनाएको छ।
गठित समितिको महामन्त्रीमा ऋषिरमण खनाल तथा कोषाध्यक्षमा प्रेमसागर कर्माचार्य नियुक्त भएका छन्। त्यसैगरी समितिका सदस्यहरूमा बसन्तकुमार श्रेष्ठ, अबिस्मी न्यौपाने, पुष्पा दास, प्रेम लामा, मोहम्मद आयतुल्ला रहमान र मञ्जु साउद (बोहरा) रहेका छन्।
नवनियुक्त तदर्थ समितिले नेपाल रेडक्रस सोसाइटीको दैनिक प्रशासनिक तथा संस्थागत कार्य सञ्चालन गर्नुका साथै संगठनको आगामी नेतृत्व चयनका लागि आवश्यक प्रक्रिया अघि बढाउने अपेक्षा गरिएको छ।
नेपाल रेडक्रस सोसाइटी देशभर मानवीय सेवा, विपद् व्यवस्थापन, रक्तसञ्चार सेवा तथा स्वास्थ्यसम्बन्धी विभिन्न कार्यक्रम सञ्चालन गर्दै आएको प्रमुख सामाजिक संस्था हो। नयाँ तदर्थ समितिको गठनसँगै संस्थाको व्यवस्थापन र सेवा प्रवाह थप प्रभावकारी हुने विश्वास गरिएको छ।
