|
नेपालगन्ज । नेपालगन्ज कारागारका कैदी बन्दीका समस्याका बारेमा प्रतिनिधी सभा सदस्य लक्ष्मी तिवारीले भेटघाट गरि समाधानको लागि पहल गर्ने बताउनुभयो ।
कारगार पुग्नुभएका सांसद तिवारीसमक्ष कैदीहरुले कारागारमा बस्ने समस्या, गरिब कैदीले दण्ड सजायसंगै जरिवाना र विगो तिर्नबाट माफ गर्नुपर्ने, ज्येष्ठ कैदीहरुलाई स्वास्थ्यको दृष्टिकोणले छुट्टै सेवा सुविधाको व्यवस्थापन गर्नुपर्ने, शौचालयमा पालो कुर्नुपर्ने समस्या, बस्ने समस्या, खानेपानीको समस्या, मानव अधिकार हनन, दण्डहिनता, विना कसुर निर्दोषलाई ल्याएर सजायमा फसाइएको बारेमा न्यायको माग, सिपमुलक तालिम, लागु औषधको मुद्दामा कारोवार गराउने व्यक्तीलाई समेत सजाय हुनुपर्ने लगायतको विषयमा आफ्ना समस्या उठाएका थिए ।
त्यसक्रममा सांसद तिवारीले आएका सबै समस्यालाई सम्वन्धित सरोकारवाला निकाय र संसद बैठकमा सम्बोधन गराउन पहल गर्ने प्रतिबद्धता गर्नुभयो । उहाँले कैदीहरुलाई मनोसामाजिक परामर्श सेवा समेत प्रदान गर्नुभयो ।
जिल्ला कारागार बाँकेमा रहेका कैदी बन्दीहरुलाई उत्प्रेरणात्मक सेवा प्रदान गरिएको छ । सामुदायिक प्रहरी सेवा केन्द्र नेपालगन्जले निःशुल्क कानुनी परामर्श, तनाव व्यवस्थापन, सकारात्मक चिन्तन, सिप तथा उद्यमशिलता, उत्प्रेरणा तथा मनोसामाजिक परामर्श दिइरहेको छ ।
यसैविच भारतको अयोध्यामा राम मन्दिरको प्राणप्रतिष्ठाका क्रममा नेपालगन्जमा निस्किएको शोभा यात्रामा सहभागी भक्तजनहरुमाथी आक्रमण गरि करिब दर्जन बढी स्थानीय घाइते भएको सन्दर्भमा सांसद तिवारीले बाँकेका प्रमुख जिल्ला अधिकारी श्रवणकुमार पोखरेलसंग शान्ति सुरक्षाका बारेमा जानकारी लिनुभयो ।
भेटघाटमा प्रजिअ अधिकारीले सो घटनाका बारेमा प्रशासनले आवश्यक छानविन गरि दोषीलाई कारवाही गर्ने प्रतिबद्धता गर्नुभयो ।
